- Lokalkyrkja er teikn på liv sjøl om mykje blir nedlagt i kretsane våre! Helsinga frå ein deltakar på årsfesten i Åsskard søndag uttrykte noko vesentleg.
Gudstenesta på Vårfruedagen (Maria Bodskapsdag) fokuserte da også på at «Guds menighet er jordens største under» som Ronald Fangen skreiv i ein sterk salme under krigen. To dåp - både av lille Aksel og av konfirmant Elida - understreka det same.
Prestevikar Odd Erik Stendahl leia gudstenesta. Soknerådsleiar Eva Svendsen takka familien Bævre for minnemidlar som har skaffa kyrkja evangeliestakar og nytt altarforheng.
Fellesskap
Årsfesten i Kyrkjestua etterpå var prega av fellesskap - om middag, kaffe og dokumentasjon av året 2024. Sjøl om Åsskard er ein liten kyrkjelyd i ei utkantbygd, kunne soknerådsleiar Eva Jorid Svendsen og kyrkjeverje Tor Rune Halset seie mykje interessant om fjoråret.
Kyrkjeverje Tor Rune Halset sa mykje positivt i si helsing til Åsskard kyrkjelyd.
Statistikk – gode konsertbesøk
Årsrapporten viser at dei 15 gudstenestene hadde 865 deltakar. Ved nattverd deltok 16 personar i snitt. Kyrkjelyden hadde 6 konsertarrangement - med i alt 636 besøkande.
Biletserie over allsidig aktivitet
Ein del svært godt befolka tiltak fell utanom statistikken - som Barnas Kyrkjekveld (to gonger i året), konfirmantdeltaking ved vanlege gudstenester, forsongarteneste, hobbyverksted til jul og påske, hyggetreff og dugnader.
Men dette og meir til kom tydeleg fram i soknerådets biletkavalkade som utfylte årsmeldinga.
Og både sodd og kaffe smaka fortreffeleg – igjen takka vere soknerådets dyktige Eva Jorid, Jane, Aashild og Kari.
Framside: Lille Aksel blir døypt av Odd Erik Stendahl.
Tekst og foto Bernt G. Bøe